Geguritan karyaku dimuat di Majalah DAMARJATI edisi 57
Posted on Januari 9, 2008 by budhisetyawan
SUKMA LELANA GUGAT
angin kang mabur kekiteran ing dhuwur samodra
sasat tanpa leren ngobahake banyu
iwak gedhe iwak cilik padha gumregah
jumedhul sakdhuwure ombak
ilang swara mlebu ing akasa
prau-prau lelangen ngoyak playune angen-angen
kanthi jala lan jaring saka sutra
obor thathit lan lintang
sambung sinambung ing wewangunan jagad
tepake isih katon cetha ing garis tangan
prasetya lan prasapa ngumbara
dadi omah urang lan kewan segara liyane
lumaku manut ilining pasir
molah malih njupuk warna cahyaning jaman
wit-witan gedhe ngadeg pating jenggeleg tanpa oyot
angin lagi thawaf
ngubengi kedhaton napas
Jakarta, 22 Juni 2001
(Geguritan di atas dimuat di Majalah Basa Jawa DAMARJATI edisi 57; periode 27 Desember 2007 s.d 9 Januari 2008; cover Bpk. HR Agung Laksono; yang terbit di Jakarta)
No comments:
Post a Comment